प्रतिनिधी सतिश पाटील मुंबई दि. १७ जुलै २०२६ आंतरराष्ट्रीय भौतिकशास्त्र ऑलिम्पियाड २०२६ मध्ये भारताने पाच सुवर्णपदके पटकावली; पंतप्रधान मोदींनी विजेत्यांचे अभिनंदन केले.
या महिन्याच्या ४ ते १२ तारखेदरम्यान कोलंबियातील बुकारामंगा येथे झालेल्या ५६ व्या आंतरराष्ट्रीय भौतिकशास्त्र ऑलिम्पियाड (IPhO) २०२६ मध्ये पाच भारतीय विद्यार्थ्यांनी सुवर्णपदके जिंकली आहेत.
सुवर्णपदक विजेत्यांमध्ये पुण्याचा कनिष्क जैन, इंदूरचा रिद्धेश अनंत बेंडाळे, नवी दिल्लीचा ऋषित गर्ग, मुंबईचा श्रेष्ठ सुरैया आणि अहमदाबादचा स्वरित जोशी यांचा समावेश आहे.
या यशामुळे भारताने, रशिया, चीन, कझाकस्तान, दक्षिण कोरिया आणि तैवान यांच्यासोबत, ८७ देशांतील ३८१ विद्यार्थ्यांमध्ये संयुक्तपणे पहिले स्थान पटकावले.
ही उत्कृष्ट कामगिरी, टाटा इन्स्टिट्यूट ऑफ फंडामेंटल रिसर्च (TIFR) चे राष्ट्रीय केंद्र असलेल्या होमी भाभा विज्ञान शिक्षण केंद्राच्या (HBCSE) नेतृत्वाखालील भारताच्या ऑलिम्पियाड कार्यक्रमाची ताकद दर्शवते.
पंतप्रधान नरेंद्र मोदी यांनी ५६ व्या आंतरराष्ट्रीय भौतिकशास्त्र ऑलिम्पियाड २०२६ मध्ये पाच सुवर्णपदके जिंकल्याबद्दल भारतीय पथकाचे अभिनंदन केले आहे. सोशल मीडियावरील एका पोस्टमध्ये पंतप्रधान मोदी म्हणाले की, ही कामगिरी देशाच्या युवाशक्तीची अमर्याद क्षमता आणि विज्ञान व संशोधनाप्रती असलेली त्यांची आवड यांचे आणखी एक उदाहरण आहे. पंतप्रधान असेही म्हणाले की, गेल्या दशकात ऑलिम्पियाडच्या विविध आवृत्त्यांमध्ये भारतीय विद्यार्थ्यांनी सातत्याने उत्कृष्ट कामगिरी केली आहे, हे देखील तितकेच कौतुकास्पद आहे.
अणुऊर्जा विभागाचे सचिव डॉ. अजित कुमार मोहंती यांनीही पदक विजेत्यांचे अभिनंदन केले आणि त्यांची ही उत्कृष्ट कामगिरी राष्ट्रासाठी अत्यंत अभिमानाची बाब असल्याचे म्हटले.
