छत्रीचा ‘माईक’, मोबाईलचा कॅमेरा अन् चिमुकल्या पत्रकारांचा आवाज; प्रशासनाला आली जाग..

प्रतिनिधी सतिश पाटील मुंबई दि. १३ ऑगस्ट २०२६ मनोरंजनाची झाली बातमी आणि नेटकर्यांनी ऐवढे व्हायरल केले की प्रशासनाने दखल घेतली, प्रशासन व लोकप्रतिनिधी जागे एका दिवसात रस्ता दुरुस्त झाला. यालाच म्हणतात मिडीयाची ताकद!
शाळकरी मुलींच्या ‘ग्राउंड रिपोर्ट’चा दणका; खांडपे–कोंदिवडे रस्त्याच्या दुरुस्तीला सुरुवात
रायगड जिल्ह्यातील कर्जत तालुक्यातील खांडपे–कोंदिवडे रस्त्याची दुरवस्था गेल्या काही काळापासून नागरिकांसाठी डोकेदुखी ठरत होती. रस्त्यावर ठिकठिकाणी पडलेले मोठमोठे खड्डे, पावसाळ्यात त्यामध्ये साचणारे पाणी आणि त्यामुळे दुचाकीस्वार, शाळकरी विद्यार्थी, ज्येष्ठ नागरिक तसेच इतर प्रवाशांना होणारा त्रास, यामुळे नागरिकांमध्ये नाराजी होती. मात्र, या प्रश्नाकडे प्रशासनाचे लक्ष वेधण्यासाठी खांडपे जिल्हा परिषद शाळेतील काही शाळकरी मुलींनी अनोखी शक्कल लढवली.
नेहा घारे आणि मानसी पवार या शाळकरी मुलींनी चक्क पत्रकाराची भूमिका साकारत रस्त्याची ‘ग्राउंड रिपोर्ट’ तयार केली. विशेष म्हणजे, रिपोर्टिंगसाठी हातात माईक नसल्याने छत्रीलाच माईकचा पर्याय बनवून मोबाईलच्या कॅमेऱ्यासमोर त्यांनी वृत्तवाहिनीच्या बातमीची हुबेहुब नक्कल केली.
रस्त्यावरील मोठमोठे खड्डे, त्यात साचलेले पाणी आणि या रस्त्यावरून प्रवास करताना नागरिकांना होणाऱ्या अडचणी त्यांनी आपल्या निरागस पण प्रभावी शैलीत मांडल्या. नेहा घारेने रिपोर्टरची भूमिका साकारली, तर मानसी पवारने कॅमेरा हाताळत या संपूर्ण ‘ग्राउंड रिपोर्ट’चे चित्रीकरण केले.
मोठे व्यासपीठ नव्हते, महागडी उपकरणे नव्हती; होता फक्त एक मोबाईल, एक छत्री आणि आपल्या रोजच्या आयुष्यातील समस्येविरोधात आवाज उठवण्याची जिद्द!
या मुलींचा व्हिडीओ सोशल मीडियावर मोठ्या प्रमाणात व्हायरल झाला. त्यामुळे त्यांच्या कल्पकतेसोबतच खांडपे–कोंदिवडे रस्त्याच्या दुरवस्थेचा प्रश्नही प्रशासनाच्या चर्चेत आला.
व्हिडीओची दखल घेतल्यानंतर आता या रस्त्यावरील खड्डे बुजवून दुरुस्तीचे काम सुरू करण्यात आले आहे. स्थानिक आमदारांनी दिलेल्या माहितीनुसार, रस्त्याच्या दुरवस्थेबाबत माहिती मिळताच संबंधित विभागाशी संपर्क साधून रस्ता दुरुस्त करण्याच्या सूचना देण्यात आल्या. नागरिकांची गैरसोय टाळण्यासाठी तसेच सुरक्षित प्रवास सुनिश्चित करण्याच्या दृष्टीने हे काम लवकरात लवकर पूर्ण करण्याच्या सूचनाही संबंधित यंत्रणेला देण्यात आल्या आहेत.
यामुळे चिमुकल्या पत्रकारांनी मांडलेला प्रश्न थेट प्रत्यक्ष कृतीपर्यंत पोहोचला आहे.
या घटनेतून एक महत्त्वाचा संदेशही समोर आला आहे. एखादी समस्या समोर दिसत असताना तिच्याकडे दुर्लक्ष करण्याऐवजी ती योग्य पद्धतीने मांडली, प्रश्न विचारला आणि तो समाजासमोर आणला, तर सामान्य नागरिकांच्याही आवाजात बदल घडवून आणण्याची ताकद असते.
एका छत्रीला माईक बनवून सुरू झालेल्या या चिमुकल्या ‘ग्राउंड रिपोर्ट’ने अखेर रस्त्यावरील खड्ड्यांवर प्रशासनाची कारवाई घडवून आणली.
नेहा घारे आणि मानसी पवार या चिमुकल्या पत्रकारांनी आपल्या कल्पकतेतून आणि धाडसातून हे सिद्ध करून दाखवले आहे की, प्रश्न मांडण्यासाठी मोठे व्यासपीठ नाही, तर आवाज उठवण्याची इच्छाशक्ती महत्त्वाची असते!



