प्रतीनीधी सतिश पाटील मुंबई दि. 26 जानेवारी 2026 नाशिकमधून एक खळबळजनक बातमी समोर आली आहे. चलनातून बाद झालेल्या आणि नासधूस झालेल्या तब्बल ४०० कोटी रुपयांच्या जुन्या नोटा घेऊन जाणारा कंटेनर लुटण्याचा मोठा कट नाशिक ग्रामीण पोलिसांनी उधळून लावला आहे. या प्रकरणी पोलिसांनी कारवाई करत मुख्य सूत्रधारासह पाच जणांना अटक केली आहे. विशेष म्हणजे यामध्ये राजकीय पक्षाशी संबंधित असलेल्या आदित्य मिरखेलकर (Aditya Mirkhelkar) याचा समावेश असल्याने राजकीय वर्तुळात मोठी चर्चा रंगली आहे.
नेमकी घटना काय?
मिळालेल्या माहितीनुसार, हा कंटेनर रिझर्व्ह बँकेच्या (RBI) जुन्या आणि खराब झालेल्या नोटा घेऊन चालला होता. या नोटा नष्ट करण्यासाठी नेल्या जात होत्या. या कंटेनरमध्ये सुमारे ४०० कोटी रुपयांच्या नोटा होत्या. आरोपींनी हा कंटेनर अडवून त्यातील पैसे लुटण्याचा प्लॅन आखला होता. मात्र, नाशिक ग्रामीण पोलिसांच्या सतर्कतेमुळे हा प्रयत्न फसला.
मुख्य सूत्रधार अटकेत
या प्रकरणात पोलिसांनी वेगाने तपासाची चक्रे फिरवत पाच संशयितांना ताब्यात घेतले आहे. यात आदित्य मिरखेलकर याचे नाव प्रामुख्याने समोर आले आहे. मिरखेलकर हा या कटाचा मुख्य सूत्रधार असल्याचे बोलले जात असून, तो एका प्रमुख राजकीय पक्षाच्या विद्यार्थी संघटनेचा पदाधिकारी असल्याची माहिती समोर येत आहे.
पोलिसांची धडक कारवाई
नाशिक ग्रामीण पोलिसांच्या स्थानिक गुन्हे शाखेने ही कारवाई केली आहे. या दरोड्याच्या कटात आणखी किती जणांचा सहभाग आहे आणि यामागे आणखी कोणाचे हात आहेत, याचा सखोल तपास पोलीस करत आहेत. ४०० कोटींच्या नोटांच्या या प्रकरणाने संपूर्ण जिल्ह्यात खळबळ उडाली आहे.
